Қазақстан Денсаулық сақтау министрлігі Ресейдегі оба және Таиландтағы лептоспироз туралы хабарламалардан кейін шекарадағы инфекцияларға қатысты жағдайды бақылауда

Қазақстан Республикасының Денсаулық сақтау министрлігі 2026 жылғы 9 қазандағы жағдай бойынша республикадағы эпидемиологиялық жағдайдың тұрақты екенін хабарлайды. Ресей Федерациясының Иркутск облысында аса қауіпті инфекцияның ықтимал жағдайы туралы және Таиландта лептоспироз ауруының өсуі туралы хабарламаларға байланысты Шығыс Қазақстан облысындағы, сондай-ақ бүкіл ел бойынша кіру және шығу пункттерінде Көліктегі КСЭК департаментінің санитарлық-карантиндік бақылау қызметкерлері тұрақты мониторинг жүргізуде.

Ведомствода Қазақстан Республикасының Денсаулық сақтау министрлігі Иркутск облысындағы жағдайдан хабардар екенін, онда БАҚ-та аса қауіпті инфекцияға күдік тудырған жағдай туралы хабарламалар пайда болғанын мәлімдеді. Қазақстандықтардың көші-қон, туризм және іскерлік байланыстар арқылы әлемдік қоғамдастықпен белсенді өзара әрекеттесуін ескере отырып, Қазақстанда осы аурулар бойынша қолайсыз елдерден аса қауіпті инфекциялардың әкелінуі мен таралуының алдын алу мәселелері тұрақты бақылауда. Мемлекеттік шекара арқылы өткізу пункттерінің барлығында санитарлық-карантиндік бақылау жүзеге асырылады. Қазіргі уақытта көліктің барлық түрлерінде дене қызуы жоғары, ауру белгілері бар немесе аса қауіпті инфекцияларға күдікті адамдар анықталған жоқ. Министрлік инфекцияның елге әкеліну қаупін төмен деп бағалайды және тек ресми ақпарат көздеріне сенуді ұсынады.

Ресейдегі жағдай

Қазан айының басында Иркутск обаға қарсы ҒЗИ-ның 28 жастағы қызметкері Дарья Шипилова белгісіз себепті ауыр пневмониядан қайтыс болды. Бұл жағдай оның жұмысының ерекшелігімен байланысты болды. Алайда Ресей үкіметі «оба індетін» растаған жоқ. Роспотребнадзордың мәліметінше, байланыста болған адамдар арасында ауру жағдайлары анықталмаған. 200-ге жуық адам бақылауға алынды, олардың 90%-ы карантинді аяқтады. Роспотребнадзор 5 мыңға жуық зертханалық зерттеу жүргізді, қауіпті қоздырғыштар анықталған жоқ. Дүниежүзілік денсаулық сақтау ұйымы (ДДҰ) жағдайды тәуелсіз бағалау үшін Ресей тарапынан қосымша деректерді сұратты.

Таиландтағы жағдай

«Тышқан безгегі», немесе лептоспироз, Таиланд Корольдігі үшін белгілі инфекция болып табылады және қазіргі жағдай пандемиямен немесе жаңа штамммен байланысты емес. Қазіргі уақытта ауру деңгейінің көтерілуі байқалады, оны жергілікті билік жаңбыр маусымымен байланыстырады. Таиландтың Ауруларды бақылау департаментінің мәліметінше, 2026 жылғы 1 қаңтардан 23 қыркүйекке дейін 3 303 ауру жағдайы және 46 өлім тіркелген. Өлім-жітім шамамен 1,39%-ды құрайды. Туристер үшін қауіпсіздіктің негізгі ережесі – лас, тоқыраған сумен байланыстан аулақ болу, әсіресе теріде зақымданулар болған жағдайда.